वेदनेचे गाणे

किती करशील तू असे सुखाचे बहाणे

डोळ्यातून वाहू देत वेदनेचे गाणे

रात्र शेवटी सरून जाते

सावलीसुद्धा विरून जाते

संपतेच की पिलाच्या चोचीतले खाणे..

डोळ्यातून वाहू देत वेदनेचे गाणे

कोण इथे असते सांग सदा सुखी

भावनांची बासरी कृष्णाच्या मुखी 

त्याच्या-तिच्या सारखेच तुझे माझे-जीणे

डोळ्यातून वाहू देत वेदनेचे गाणे

पुन्हा भरेल आकाश लख्ख तारकांनी

पुन्हा भरेल अंगण शुभ्र प्राजक्तांनी

दुपारच्या उन्हात जमव शांत राहणे  

डोळ्यातून वाहू देत वेदनेचे गाणे

किती करशील तू असे सुखाचे बहाणे

डोळ्यातून वाहू देत वेदनेचे गाणे..