माझ्या अरसिक प्रिये..

माझ्या अरसिक प्रिये,

इतकी ग कशी तू अरसिक? तुला ना पावसाचं अप्रूप आहे ना गुलाबी थंडीचं.. तुझ्या मते पाऊस हा सगळ्यात जास्त हवाहवासा भारतातल्या शेतकऱ्यांनाच असतो. प्रेमी युगुलांचा आणि पावसाचा काहीही संबंध नाही! याचं कारण तू देतेस की पाऊस काही प्रेमी युगुलांसाठी पडत नाही आणि जर का तो पडलाच नाही तर काही त्या दोघांच्यातलं प्रेम कमी होणार नाही. तसेच, तुझ्यामते थंडी ही गुलाबी वगैरे नसतेच! कोणा लेखक किंवा कवीला कधी ती तशी दिसली असेल तर तो खोटं तरी बोलत असेल नाहीतर मिस्टर इंडिया ज्या लाल-गुलाबी काचांच्या चष्म्यात दिसत असे तसा चष्मा तरी त्याने तेव्हा घातला असेल!

तुला आठवतंय..त्या रात्री गच्चीवर आपण दोघं गप्पा मारत बसलो होतो..छान वारा सुटला होता..आकाशात पिठूर चांदणं पडलं होतं..सगळं अगदी भलतंच romantic होतं. तेव्हा मी म्हणालो, " इंद्रदरबारी दिवाळी चालू असेल कदाचित! अप्सरांनी किती पणत्या लावल्यात बघ! का त्यांनी ठिपक्यांची रांगोळी काढायला सुरुवात केली असेल ग..?" त्यावर तू म्हणाली होतीस, "इंद्र आणि तुझ्या त्या अप्सरांच्या डोक्यात कोंडा झाला असेल कदाचित! एकेकाला धरून स्वच्छ आंघोळी घातल्या पाहिजेत!!"

देवावर तर विश्वास नाहीचे तुझा आणि नाशिबावारही नाहीये. एकदा बघ आपला वाद झाला होता नियतीच्या अस्तित्वावर.. तेव्हा 'वेळ आली की डोळे मिटून घेण्यापलीकडे आपल्या हातात काही नसतं' हा माझा मुद्दा होता. तेव्हाचं तुझं एक वाक्य मी कधीच विसरू शकणार नाही..तू म्हणाली होतीस, "आपल्या हातात काही नसलं तरी मनगटात नेहेमी ठेवायचं. तुझ्या नियतीच्या तळहातावरच्या रेषांना मनगटापर्यंत कधी पोहचताच येत नाही..!"

भावूक अजिबात नसलीस तरी तुझ्याइतकं मुक्या प्राण्यांवर प्रेम करणारं मी कधीच कोणी पाहिलेलं नाहीये! कुत्र्या-मांजरांच्यात केवढी रमून जातेस तू! केवढ्या गप्पा मारतेस त्यांच्याशी! त्यांना काही कळतं तरी का ग?! 'अगदी नि:स्वार्थीपणे फक्त कुत्राच प्रेम करू शकतो' असं तू म्हणतेस..कधी कुठल्या प्राण्याला दुखापत झालेली तू बघितलीस की तुझ्या टपोऱ्या डोळ्यातून घळाघळा वाहणारं पाणी मी कधी थांबवू शकलो नाहीये..

फक्त कर्मयोगावर तुझा विश्वास. मन लावून काम करावं. कामातला आनंद घ्यावा. सतत उत्साही, आनंदी राहून प्रत्येक काम भक्तिभावाने करायला कुठून शिकलीस ग? वेगळीच आहेस तू..आम्ही काही मित्रांनी ठरवलं होतं की खूप मोठं होऊन, खूप पैसे कमवून गोर-गरिबांसाठी काहीतरी करायचं..तू तुझा पहिला पगारच दान केलास?! आणि हे तुझं स्वप्न होतं म्हणे! हे असलं कसलं स्वप्न?!

कसली भारी आहेस अग! जगातली सगळ्यात भारी! माझ्या जीवनाचं तर सार्थक झालंय! पण तू माझ्यात काय एवढं बघितलस? सांग ना, तुला मी का आवडलो?

नक्की कळव..

तुझाच,

प्रियकर

ता.क: एवढं पण Practical असायची गरज नसते आयुष्यात!

***

माझ्या खूप खूप रसिक प्रियकरा,

तुझ्यातला प्रामाणिकपणा मला आवडला. आणि एक माणूस म्हणून तू उत्तम आहेस.

तुझीच,

अरसिक प्रेयसी!

ता.क: ते ओट्यावर ठेवलेलं तेवढं ताक पिऊन टाक! :P

***